Guillaume IX d'Aquitaine - Pos vezem de novel florir | Текст песни

• Тексты песен
• Guillaume IX d'Aquitaine
• Pos vezem de novel florir

Pos vezem de novel florir
Pratz, e vergiers reverdezir,
Rius e fontanas esclarzir,
Auras e vens,
Ben deu chascus lo joi jauzir
Don es jauzens.
D'amor non dei dire mas be.
Quar no-n ai ni petit ni re?
Quar ben leu plus no m'en cove!
Pero leumens
Dona gran joi qui be-n mante
Los aizimens.
A totz jorns m'es pres enaisi
C'anc d'aquo c'amei no-m jauzi;
Ni o farai, ni anc non ho fi;
C'az essiens
Fauc maintas ves que-l cor me di:
Tot es niens.
Per tal n'ai meins de bon saber
Quar vueill so que non puesc aver;
E si-l reprovers me ditz ver,
Sertanamens
A bon coratge bon poder,
Qui-s ben sufrens.
Ja no sera nuils hom ben fis
Contr'amor, si non l'es aclis,
Et als estranhs et als vezis
Non es consens,
Et a totz sels d'aicels aizis
Obediens.
Obediensa deu portar
A motas gens qui vol amar,
E cove li que sapcha far
Faitz avinens
E que-s gart en cort de parlar
Vilanamens.
Del vers vos dic que mais ne vau
Qui be l'enten, e n'a plus lau:
Que-ls motz son faitz tug per egau
Comunalmens,
E-l sonetz, ieu meteus m'en lau,
Bos e valens.
A Narbona, mas ieu no-i vau,
Sia-l prezens
Mos vers, e vueill que d'aquest lau
Sia guirens.
Mon Esteve, mas ieu no-i vau,
Sia-l prezens
Mos vers, e vueill que d'aquest lau
Sia guirens.

Guillaume IX d'Aquitaine еще тексты